Kazanobr.ru | Электронный научно-методический журнал | Выпуск №36

Кәрәзле бал савыты (Балалар бакчасында театр эшчәнлеге)

Фазлиева Гөлнур Фәритовна, тәрбияче
Казан шәһәре Совет районы “Татар телендә тәрбия һәм белем бирүче 67 нче номерлы катнаш төрдәге балалар бакчасы”
муниципаль автономияле мәктәпкәчә белем учреждениесы

Максат: балаларның иҗади сәләтләрен ачу; балаларны театр сәнгатенә тарту сәхнәләштерүнең сәнгати чараларын (гәүдә торышы, мимика, интонация, хәрәкәтләр) кулланырга өйрәтү; театр сәнгатенә мәхәббәт тәрбияләү.

Бурычлар:

- белем бирүдә: балаларның сүзлек байлыгын арттыру, бәйләнешле сөйләм телен үстерү;

-үстерелешле: әкиятләр ярдәмендә балаларда матурлыкны күрә белергә, яхшылыкка өйрәтү, шәфкатьле, гадел, кыю булу күнекмәләре булдыру;

-тәрбияви: А.Алиш иҗатына кызыксыну уяту, мәхәббәт тәрбияләү.

Җиһазлау: урманда чәчәкләр патшалыгы күренешләре ясалган пәрдә; аның каршында агачлар, елга күренеше, төрле җәнлекләр; геройлар өчен костюмнар, барабан, кәрәзле бал өчен савытлар.

Күренеш музыка астында бара.

Алдан башкарылган эш: шөгыльләрдә һәм режим моментларында татарт халык әкиятләрен уку; А.Алишның “Бал корты һәм шөпшә” әкиятенә иллюстрацияләр ясау; рәсемнәрдән, әкият китапларыннан күргәзмә оештыру; мультфильмнар карау, алар буенч әңгәмә оештыру; викторина өчен сораулар әзерләү.

Катнашалар: автор, патша, чикерткә, шөпшә, камка, бал кортлары.

Эшчәнлек барышы

(Аланга патша, кырмыскалар һәм камка чыга. Җырлап патша керә.)

Патша: Картайдым шул мин, бал да җыя алмыйм.Минем әмерне тыңлагыз! Туктап тор инде! (Барабанда уйнаучыга әйтә.) Кем бал салырга яхшы савыт әзерли,барлык чәчәктәге балны шуңа бирәм!

(Болын күренеше.)

Чикерткә: Тыңлагыз! Тыңлагыз! Чәчәкләр патшасы ярыш үткәрә: “Кем бал салырга яхшы савыт әзерли, барлык чәчәктәге балны шуңа бирәм!”- ди.

Автор: Бөҗәкләр, көнне-төнне белмичә, тырышып хезмәт куйган. Савытлар эшләгәннәр. Һәркайсының да бал җыярга рөхсәт аласы килгән.

(Бал корты һәм шөпшә диалогы.)

Шөпшә: Сәлам, бал корты!

Бал корты: Исәнме, шөпшә.Син бал савыларын ясадыңмы соң әле?

Шөпшә: Әй, өлгерермен әле. Әйдә, минем белән кинога киттек.

Бал корты: Юк, бармыйм,шөпшә дус, мин уйлыйм.

(Патшалык.)

Патша: Әйдәгез, савытларыгызны тикшереп карыйк инде! (Савытларга бал салып карыйлар. Ләкин савытлар ватыла.)

Патша: (ачуланып.) Мондый савытлар миңа кирәкми. Шуңа күрә сезгә бал эләкми! (Бөҗәкләр, уйга батып, өйләренә очып китәләр.)

(Бал корты өендә.)

Шөпшә: Сәлам, бал корты!

Бал корты: Сәлам,күрше! Савытың ничек?

Шөпшә: Ясый да башламадым әле. Соңыннан да өлгерермен. Киттек минем белән комлыкта кызынырга.

Бал корты: Юк, мин бармыйм, мин эшлим.

(Патшалык.)

Автор: Ә бу вакытта чәчәкләр башлыгы тузына.

Патша: Ясалган савытларның барысы да яраксыз! Иртәгә ярышның соңгы көне дип игълан итәм!

(Аланда.)

Чикерткә: Иртәгә соңгы көн! Иртәгә соңгы көн!

(Патшалык. Патша бөҗәкләрне куып чыгара.)

Патша: Күз алдымнан югалыгыз!(Шөпшә патша янына килә.)

Камка: Нинди матур!

Патша: О-о-о-о-о, бик матур! Бал корты кайда соң? Өлгермиме әллә?

(Бал кортлары очып керә.Кәрәзләрен патша каршына куялар.)

Патша: Әйдәгез,тикшереп карыйк инде савытларны!

(Балны савытларга салалар. Шөпшәнеке ишелеп төшә.)

Патша: Тырышканнар, менә дигән кәрәз эшләп чыкканнар.Шуңа күрә теләсә кайсы чәчәктән, теләсә күпме бал җыярга рөхсәт бирәм. (Барабанчыга дәшеп.) Нишләп торасың инде, уйна!

Автор: Шул көннән башлап, бал кортлары чәчәкләрдән бал җыярга тотынганнар. Ә шөпшә исә, ялкаулыгы аркасында, хурлыкка калган